तंग होके कर लई आत्महत्या

जिला महोबा, ब्लाक जैतपुर, थाना अजनर क्षेत्र के एक गांव में 11 नवम्बर खा छेड़खानी को मामला सामने आओ हतो। लड़की ने मिट्टी को तेल डर आगी लगा लई। 12 नवम्बर खा इलाज होत समय लड़की की झांसी अस्पताल मे मोत हो गई हे। सूचना मिलतई एस.पी. वजीह अहमद ओर अपर एस.पी. डाक्टर रामयश पुलिस बल के साथे मौके में पोहचे, साथ ही थाना इंन्चार्ज राजीव यादव खा सस्पेंट कर दओ हे।
परिवार वाले बताउत हें की बताउत हे की शाम खे लड़की शौच के लाने गई हती। तभई गांव को ही विजय राजपूत लड़की खा अकेले जान के छेड़खानी करन लगो। लड़की जोर से चिल्लानी तो विजय छोड़के भाग गओ साथे की बतायें पे जान से मारें की धमकी दई। लड़की घर आई ओर सब बात बताई हम लोग विजय के घर उल्हना देन गये। तभई लड़की ने आगी लगा लई। लड़की खा इलाज के लाने अस्पताल ले गये ओते से डाक्टर ने झांसी रेफर कर दओ। इलाज होत समय लड़की की मोत हो गई। अजनर थाना के एस.आई. शंकरलाल बताउत हे की विजय के खिलाफ धारा 354 (छेड़खानी) 306 (तंग आकर आत्महत्या करना) ओर पाक्सो एक्ट के तहत मुकदमा लिखो हे। विजय पकर गओ हे।