डी.एम. के फटकार, शुरू भा विकास काम

जिला बांदा, ब्लाक बबेरू, गांव आहार। या गांव 2013-14 से डाक्टर राममनोहर लोहिया समग्र ग्राम है। 10 दिसंबर का डी.एम. अउर एस.डी.एम. जांच करिन। जांच के बाद बजट आ गा है, पै अबै भी काम नहीं शुरू आय। गांव के मड़ई काम के मांग करिन हैं।
राजकुमार का कहब है कि हमार गांव मा आर.सी.सी. रोड देखैं तक का भी निहाय। खड़ण्जा बहुतै पहिले बने रहैं जउन उखड़ गे हैं। रसीदन बताइस कि मोहल्ला का छह महीना से हैण्डपम्प खराब है। सौ घर के मड़ई दूसर मोहल्ला से पानी भर के लावत है। तालाब मा भी पानी निहाय कि वहिसे आपन जानवरन का पानी पिला सकन। न तौ तालाब का सुन्दरी करन करावा गा आय।
सुखरनिया कहत है कि गांव मा रहत रहत चउथी पीढ़ी चलत है। आज तक बिजली के रोशनी देखैं का नहीं मिली। शिवकुमारी अउर पियरिया कहिन कि कालोनी, शौचालय अउर पेंशन के मांग प्रधान से करत हन, पै वा गांव के कउनौ भी मड़ई का इं लाभ नहीं दीन गा आय। अब इं काम करावा जाय का चाही।
गांव के अउर कइयौ मड़ई बताइन कि 10 दिसंबर का पूर्व माध्यमिक विद्यालय मा डी.एम. सुरेश कुमार प्रथम अउर एस.डी.एम. बबेरू गांव के लोगन साथै मीटिंग करिन। बहुतै हैरानी जताइन कि लोहिया गांव मा विकास ही निहाय। प्रधान, सचिव का फटकार लगाइन अउर एक हफ्ता के भीतर विकास करावैं का कहिन हैं।
प्रधान गोमती कहिन कि डी.एम. के कहे के हिसाब से एक हफ्ता मा सबै काम निपटाये जइहैं। अब गांव मा काम शुरू है। सचिव भवानी सिंह कहत है कि गांव के विकास खातिर तीस लाख रूपिया का बजट आ गा है। सर्वे मा समाजवादी पेंशन के इन्क्यानबे पात्र मड़ई चयन कीन गे हैं। उनसठ कालोनी अउर एक सौ अस्सी शौचालय बनाये जइहैं।