डीएम तक दिया आवेदन, डेढ़ साल बाद भी चित्रकूट जिले के बरहा कोटरा गाँव में नहीं है बिजली

जिला चित्रकूट, ब्लाक मऊ, गांव बरहा कोटरा सूखा से निपटै खातिर अउर खेत के सिंचाई खातिर कुल्लू खेत मा रिबोर कराइस हवै। खम्भा अउर ट्रांसफार्मर तौ लाग गे पै डेढ़ साल होय के बाद भी इं खम्भा मा तार नहीं लगाई गे आय। या समस्या पूर गांव मा हवै। खेती होय के बाद भी बिना पानी के हियां के मड़ई अनाज खातिर तरसत हवै।
हर साल पचासन हजार का नुकसान होत हवै। कुल्लू निषाद बताइस कि मोर अस्सी हजार रुपिया खर्च होइ गा हवै रिबोर करावै मा हमार गांव मा आज तक बिजली नही आयी आय। विभाग कइत से खम्भा अउर ट्रांसफार्मर तौ लगवा दीन गा हवै पै तार नहीं लगाई गे आय।
यहिके खातिर कइयौ दरकी बिजली विभाग डी. एम. अउर मंगल दिवस मा दरखास दीनेंहौं पै अबै तक सुनवाई नहीं होत आय। बिजली विभाग का जेई आज कल मा टालत रहत हवै। पानी के बिना हमार पूर फसल सूख पड़ी हवै। पानी होत तौ हम आपन खेत मा साग सब्जी भी लगा सकत रहै।
बगलू बताइस कि हमार पानी के बिना चार बिगहा धान के फसल सूख गे हवै जेहिसे हमार बहुतै नुकसान भा हवै। खम्भा ट्रांसफार्मर लगा दीन गा हवै पै कउनौ अधिकारी झांके नहीं आवत आहीं।
बिजली विभाग संविदा कर्मचारी रामजस रैकवार का कहब हवै कि अगले मंगल दिवस से पहिले जेई का रिपोर्ट दई देबे। यहिके बाद अधिकारी काम करिहैं।

रिपोर्टर- सुनीता देवी

01/06/2017 को प्रकाशित