जिला चित्रकूट के ब्लाक मऊ के बरगढ़ कस्बा के अशोक चौराहा मा 19 अप्रैल का ट्रैक्टर अउर साइकिल के बीच टक्कर होइगे हवै। जेहिमा 12 साल के नौसीर की दुर्घटना स्थल मा मउत होइगे हवै।
मृतिका का भाई सलमान का कहब हवै कि जबै मोहिका पता चला हवै तौ मैं गये हौं, तौ व ड्राइवर ट्रैक्टर चढ़ा के भागा जात रहा हवै। पहुंचै के बाद मैं 100 पुलिस का फोन कीने हौं, तौ फेर पुलिस आई हवै अउर पकड़ के लइगे हवै, वा ड्राइवर भाग गा हवै। वहिके बाद दरोगा आवा हवै तौ लिखा पढ़ी करत रहा हवै। कारन यहै हवै कि बच्ची अपने महतारी का पानी लइके जात रही हवै। सड़क बनत हवै तौ सड़क पार करत समय दहेज के सामान से भरा ट्रैक्टर कउनौ चौदह-पन्द्रह साल का लड़का चलावत रहा हवै। जउन चढ़ा के भाग गा हवै। मालिक का थाने मा बइठाय हवै।
मृतिका का मामा नसीफ बताइस कि बच्ची साइकिल मा पानी से भरा डिब्बा लइके सड़क पार करत रही हवै। वहिके महतारी गरूर रोड़ कइती खेत मा रही हवै तौ हुंवा पानी दे जात रही हवै।
मृतिका का पिता मंसूर का कहब हवै कि थाना मा अप्लिकेशन दइ दीने हौं। अलिकेशन मा गाड़ी मालिक कमलेश का नाम डारें हौं।
रिपोर्टर- सुनीता देवी
