जिला बांदा। सरकारी टेंडर हथियावैं का लइके 15 जून का दुपहरी के लगभग ढाई बजे डी.एम. अउर पुलिस अधीक्षक आफिस से चार कदम दूर सटे लोक निर्माण विभाग खण्ड दुई मा ठेकेदार सचिन दीक्षित अउर निदिन मिश्रा के बीच गोली चल गे। जेहिसे विभागीय करमचारी अउर सड़क से निकरैं वाले यात्रिन मा भगदड़ मच गे।
सचिन दिक्षित कहत है कि तीन महीना पहिले तिन्दवारी क्षेत्र के एक काम खातिर मैं टेंडर डाले रहौं। वहिके साथै सिंधन कला का निदिन मिश्रा भी एक टेंडर डालिस रहै। टेंडर खुलै के बाद मोहिका लगभग 15 लाख रूपिया का काम मिल गा रहै। या बात के खुन्नस मा निदिन मिश्रा मोरे साथै या जान लेवा हमला करिस है। यहिके सूचना हम कोतवाली मा दीन तौ तुरतै क्षेत्राधिकारी अउर कोतवाली पुलिस पी.डब्लू.डी. विभाग मौके मा पहुंच गे अउर जांच पड़ताल करिन हैं। साथै फायर करैं वालेन के खिलाफ धारा 307 का मुकदमा लिखिन, पै अबै पकड़ा कउनौ नहीं गा आय।
रिपोर्टर – शिवदेवी
