टूट फर्स, फटी टाट, रसोई मा कूड़ा या हालत मा है जूनियर स्कूल

जिला बांदा, ब्लाक तिन्दवारी, न्याय पंचायत पलरा। हेंया पूर्व माध्यमिक विद्यालय के टूटी फर्स मा बच्चा बइठत हैं। मीनू के हिसाब से मिड्डेमील नहीं बनत। रसोई घर मा कूड़ा जमा है। शौचालय चालू हालत मा निहाय। जबैकि हेंया के हेडमास्टर संकुल प्रभारी हैं।
या स्कूल के हेडमास्टर रामदेवी संकुल प्रभारी हैं। आठ ग्राम पंचायत के स्कूलन के व्यवस्था अउर निगरानी इनके ऊपर है, पै वा स्कूल के स्थिति खुदै यतनी खराब है। या स्कूल मा कुल एक सौ सत्तर बच्चा हैं। 21 फरवरी का मात्र तिरानबे बच्चन के हाजिरी चढ़ाई गे रहै, पै मुश्किल से कुल पचीस तीस बच्चा कक्षन मा रहे होइहैं। पढ़ाई का लइके बच्चा बहुतै कमजोर हैं। हेडमास्टर के बतावैं के हिसाब से बच्चा टूटी फर्स अउर फटी टाट मा बइठ रहैं। टूट कुर्सी अउर बेंच का कबाड़ एक कमरा मा भरा है। कम्प्यूटर कक्ष मा कम्प्यूटर, सिलाई मशीन अउर साइकिल धरे जंग खात हैं। हेडमास्टर कहिन कि बच्चन के तोड़ फोड़ के डर से सामान सुरक्षित कमरन मा धरा है। शौचालय तौ बहुतै बने हैं, पै चालू हालत मा एक भी निहाय। 21 फरवरी का मिड्डेमील दुई बजे पत्रकारन के सउहें बनावा गा। बच्चन के बतावैं से या भी पता चला कि 20 फरवरी का भी खाना नहीं बना आय। ज्यादातर तहरी अउर पानी वाली खीर शनिवार का बनत है। मउके मा ए.बी.एस.ए. तिन्दवारी जांच पड़ताल मा आई रहैं, पै उनके हिसाब से सब ठीक रहै।
बेसिक शिक्षा अधिकारी डाक्टर सत्यनारायण कहिन कि जांच के बाद कारवाही कीन जई। उनका स्कूल के गड़बड़ी के बारे मा पता नहीं रहा आय।