टूटी परी नाली भरो पानी, फेलत मच्छर

जिला महोबा, ब्लाक जैतपुर, कस्बा बेलाताल, मोहल्ला डेवढ़ी पुरा। के आदमियन को आरोप हे की बीस साल से हरीमोहन के घर में प्रधानी चलत हे। पे डेवढ़ीपुरा मोहल्ला में नाली ओर रास्ता नई बनी हे।
रामकिशोर गुप्ता, महेश, सुकरती, राधारानी ओर मीराबाई कहत हे की जा रास्ता की नाली बीस साल से खुदी परी हे। एतई से पाइप लाइन भी परी हे। घरन में गन्दो पानी जात हे। द्वारे मे बेठ नई पाउत हे। बेलाताल प्रधान हरीमोहन कहत हे की 2011 के अनुसार कस्बा की आबादी अट्ठारह हजार हे। विकास के लाने हर गांव के बराबर रुपइया आउत हतो। कस्बा में कहूं न कहूं काम चलत रहो हे। जीसे ओते की रास्ता ओर नाली नई बन पाई हे। 2015 में लोहिया गांव भओ हे। पूरे कस्बा को अच्छो विकास करो जेहे। एसई कस्बा पनवाड़ी, बाजार के पास। एते के नाला की सफाई न होंय से आदमियन खा बिमारी को डर हे। नाला के सफाई करायें की मांग करत हे।
धरम राजपूत ओर राजकुमार कहत हे की एते बाजार लगत हे, आदमी सड़ी सब्जी नाला में फेक देत हे। जीसे कीड़ा पड़ जात हे, ओर बदबू आउत हे। मच्छर भी लगत हे। रात में हम दुकान नई खोल पाउत हे, न ही ग्राहक आउत हे। गन्दगी से पूरो नाला भर गओ हे। प्रधान से कहत हें तो ऊ नई सुनत हे। प्रधान आशाराम कहत हे जनवरी 2015 से मोये पता नइयां की सफाई कर्मी कोन हे। मेंने सचीव से कहो भी हे, कोनऊ सुनवाई नई भई हे। कस्बा की आबादी तीस हजार हे।