जिंदा जलाइन, इलाज के दौरान अस्पताल मा मउत

जिला बांदा, ब्लाक महुआ, गांव खानपुर। हेंया के देवीदयाल का आरोप है कि वहिके अट्ठारह साल के लड़की नीलम का 14 अप्रैल के दिन एक बजे जिंदा जला दीन गा। 15 अप्रैल का इलाज के दौरान वहिके मउत होइगे।
देवीदयाल के परिवार अउर रिश्तेदारी के कइयौ मड़ई बताइन कि 14 अप्रैल का दुपहरी एक बजे लड़की शौच गे रहै। तीन घंटा तक घर वापस नहीं आई। ढूढ़ै मा लड़की खेत मा तड़पत मिली। लड़की महतारी से बताइस कि रामऔतार, गांव का प्रधान भारतशरण, पंचायत मित्र रमेश अउर पंचायत मित्र का चाचा अवधेश मिल के वहिके ऊपर तेजाब डाल के जिंदा जला दिहिन। दूनौ आंखी फोड़ डालिन हैं। हम तुरतै जिला अस्पताल मा लायेंन अउर बारह बजे लड़की के मउत होइगे। 9 जून का नीलम के शादी होय का रहै। या घटना मा मोहल्ला के मड़ई के मुंह से दबे जुबान या भी सुनैं का मिला है कि जमीन खातिर दुश्मनी रहै। उंई ही लड़की का पहिले बलात्कार करिन, फिर जला दिहिन।
गिरवां थाना एस.ओ. चैधरी रमेश सिंह का कहब है कि चार लोगन के खिलाफ धारा 326 (आग लगा के जला देब) लाग है। गिरफ्तार करैं के काशिश कीन जात है।