जाब कार्ड देखावत जल्लो
जिला बांदा, ब्लाक महुआ, गांव पिथौराबाद। हेंया के मड़ई बताइन कि उनका दुई साल से मनरेगा का काम नहीं मिलत। या बात के सच्चाई तौ या है कि उनके जाब कार्ड का नवीनीकरण ही नहीं कीन गा आय। ज्यादातर जाब कार्ड 2011 तक के खातिर बने हैं।
चैनू बक्स का जाब कार्ड 1 अप्रैल 2007 का बना आय। वहिमा तालाब खुदाई अउर वृक्षारोपण का काम कुल अट्ठारह दिन का मिला रहै। तबै से काम नहीं मिला आय। 2011 से जाब कार्ड भी रद्द होइगा है। वा काम खातिर कइयौ दरकी प्रधान से मांग करिस पै कउनौ सुनवाई निहाय।
मुन्ना के जाब कार्ड संख्या 3142007058201002 है। 1 जनवरी 2009 मा जाब कार्ड बना पूरा कोरा है। यहिनतान सईदी के जाब कार्ड के संख्या 3142007058092002 है। 30 मई 2007 मा बना है। या जाब कार्ड भी कोरा है। एक भी दिन काम नहीं मिला। गांव मा लगभग पांच सौ जाब कार्ड है। जेहिमा सबहिन की तारीख खतम होय से उंई रद्द हैं। प्रधान या तौ एंई जाब कार्ड मा नई तारीखें चढ़ावैं। या फेर नये जाब कार्ड बनवावै।
प्रधान रूकमिन का कहब है कि मड़ई काम नहीं करैं चाहत। या मारे जाब कार्ड के नवीनीकरण के बारे मा नहीं सोचा गा। मड़ई हमसे नवीनीकरण के मांग करै तौ जरूर कीन जई।