जांच के बाद कोटा निरस्त

जिला अम्बेडकरनगर, ब्लाक टांडा, ग्रामसभा डाड़ी बेलगार। हिंआ कै कोटेदार के मनमानी तरीका से कम राशन दियै कै शिकायत से कोटा निरस्त होइगै।
कार्ड धारक मिट्ठूलाल, जवाहर, ठाकुरदीन, सुभाष, वृजलाल, जयकरन अउर निर्मला देवी लगभग सैकडौं मनई कै आरोप बाय कि कोटेदार मोतीलाल बेटवा रामजियावन राशन वितरण करै मा धांधली करत रहिन। अन्तोदय कार्ड धारक का पैंतिस किलो के बजाय बत्तिस किलो सौ रुपया मा दियत रहिन। अउर बी.पी.एल. कार्डधारक का एक सौ पन्चान्वें के बजाय दुई सौ पन्द्रह रुपया लियत रहिन। अउर चीनी कभौ-कभौ त्योहार मा एक किलौ दै दियत रहिन। मिट्टी कै तेल भी बीस रुपया लीटर दियत रहे। कुछ पात्रन कै सूची मा नाम रहते हुए भी राशन नाय दियत रहिन।
तुलसीराम वसीउल्लाह बताइन कि गांव के मिट्ठूलाल से यही के ताई बातचीत होइगै। विरोध मा सब गांव वाले कोटा के दुकान के सामने धरना प्रदर्शन कइके जांच कै मांग करिन।
डी.आई.एस.ओ. अब्दुल रहमान बताइन कि 28 मार्च का जांच कीन गै तौ मामला सही पावा गै। जेसे कोटा निरस्त कै दीन गै।