जांच करें के बाद कारवाही को दओ भरोसा

महोबा जिला में 29 अक्टूबर 2014 खा 102 ओर 108 एम्बूलेंस गाड़ी के ड्राइवरन ने अपने सुपरवाइजर नितिन बाजपेयी के ऊपर वेतन कटौती ओर अभद्रता को व्यवहार करे को आरोप लगा के हड़ताल करी हे। ऊखे ऊपर कारवाही करें के लाने सी.एम.ओ. खा दरखास दई हे। 102 एम्बूलेंस के ड्राइवर आनन्द, रामकुमार झा ओर मुदित कुमार ने बताओ कि हम छह महीना से गाड़ी चलायें को काम करत हे। सुपरवाइजर नितिन बाजपेयी हम से हर महीना को दो हजार रूपइया घूस मांगत हे, न देय पे अभद्रता से व्यवहार करत हे। जीखे जिते मन होत हे ऊखे ओई ब्लाक में भेज देत हे। 108 एम्बूलेंस के ड्राइवर अशोक, रंजीत ओर अतुल ने कहो कि हमाये तीन महीना से वेतन की कटौती करके देत हे। कहत हे कि अगर रूपइया न देहों तो तुम्हाई गैर हाजरी चढ़ा देहों। एई से हमने 29 अक्टूबर खा बन्द करके सी.एम.ओ. खा ज्ञापन दओ हे। सुपरवाइजर नितिन बाजपेयी ने बताओ कि हमे ड्राइवरन के खिलाफ गुप्त शिकायत मिली हती। जीसे हमने जांच में सही पाओ हतो तो हमने ऊसे कहो हतो। एई बात खा लेके हंगामा करो हे। सी.एम.ओ. ने ज्ञापन खा गम्भीरता से लेके जांच करा के कारवाही करें को अश्वासन दओ हे।