अनशन में बेठे आदमी
जिला महोबा, ब्लाक जैतपुर, कस्बा जैतपुर ओर कुलपहाड़। जैतपुर कस्बे के मातादीन ओर प्रकाश के साथे दस आदमियन ने बताओ कि 1975 में निर्बल आवास योजना के तहत हमाये कुलपहाड़ स्टेशन के एते घर बने हते। लगभग पन्द्रह साल रहे खे बाद गरीबी खे कारन हम परदेश चले गये। अब बल्देव, सुरेश, भूपेन्द्र ओर रमाकान्त ने 20 मई 2014 खा हमाये घरन खा जे.सी.बी. से गिरा दओ हे। जीखी रिपोर्ट कुलपकाड़ थाने में लिखाउन गये, पे ओते रिपोर्ट नई लिखी आय। एई से 10 जून 2014 से हम महोबा के कचेहरी मैदान में आमरण अनशन करें हें। जभे तक हम खा नियाव न मिलहे हम अनशन न टोरबी। कोशिश के बाद भी कुलपहाड़ थाने से कोनऊ जवाब नई मिलो हे। जैतपुर चैकी में बात करे की कोशिश करी गई, पे बात नई हो पाई हे।
एसई कुलपहाड़ कस्बा टोरिया मोहल्ला की सबरानी ने बताओ कि मोई 3 बीघा जमीन में कस्बा को लखचन्द्र पण्डित पन्द्रह साल से कब्जा करे हे। पेहले में ऊ जमीन खा जोतत बोउत हती। अब अगर में खेत में जात हों तो ऊ गाली गलौज करत हे। ईखी दरखास मेंने पन्द्रह दिन पेहले तहसील दिवस में ओर दुबारा 10 जून 2014 खा एस.डी.एम. खा दई हे।
लखचन्द्र ने बताओ कि ऊ जमीन हमाये पुरखन की आय। सबरानी की जमीन रोड के ऊ पार हे। ऊ कब्जा करे को झूठो आरोप लगाउत हे।
कुलपहाड़ के एस.डी.एम. मोहम्मद रिजवान ने कहो कि धारा 14 भू राजस्व अधिनियम के तहत ईखी जांच कराई जेहे। अगर विवाद होहे तो ऊखे कब्जा दिबाओ जेहे।
दरखास देत सबरानी