जिला बांदा, ब्लाक नरैनी, अतर्रा थाना क्षेत्र के गांव महोतरा। या गांव मा दलित अउर तिवारिन के बीच चलत ग्यारह बिसुवा जमीन का मामला मा दुश्मनी यतनी बढ़ गे कि दलित परिवार के राजू के घर मा घुस के हत्या कइ दीन गे। साथै वहिके महतारी के भी हांथ गोड़ तोड़ दीन गे। जेहिसे व जिला अस्पताल मा भर्ती है।
महोतरा गांव के भग्गो बतावत हैं कि मोरे तीन लड़का रहै। जेहिमा दुई पागल है अउर राजू नींक रहै। हमार अउर तिवारिन का जमीन के विवाद मा बहुतै दिन से मुकदमा चलत आय। या बात का जइके उंई कइयौ दरकी हमसे लड़ई झगड़ा कई चुके हैं, पै मैं आपन जमीन नहीं छोड़े आहूं। मनसवा भी मर चुका है मैं आपन परिवार मा अकेले हौं
हर दरकी के जइसे या दरकी भी 10 जून का शाम के खूुबै लड़ाई भे। यहिके बाद 11 जून का सुबेरे तिवारी परिवार के लगभग 10 मड़ई मोरे दुआरे के दरवाजा खोल के घुसे आय। मोर लड़का चूल्हा के पास बइठ रहैं।
मैं लड़का का चिल्लायेंव कि भाग इं हमरे भीतर कहे का आय हैं। लड़का दिवार चढ़ के भागैं के कोशिश करिस कि वहिका सब जने मिल के दबोच लिहिन। लाठी डण्डा से मारैं लाग मैं आपन जइसे बचावैं के कोशिश करें व तौ मोहिका भी मार के डार दिहिन हैं। जेहिसे मोरे लड़का के मौके मा मउत होईगे है। दुई दिन तक लाश पोस्टमार्टम खातिर रखी रही है अउर मोहिका पुलिस के जरिये जिला असपताल मा भर्ती करावा गा है। अब उनके खिलाफ कारवाही पुलिस करत है।
अतर्रा थाना एस.ओ. पी.एन. सिंह का कहब है कि वहिका मुकदमा लिख गा है। हत्या के धारा 302 लाग है। रोहित अउर संगम का 15 जून का पकड़ के जेल भेज दीन गा है। बांकी लोगन का पकड़ैं के कोशिश कीन जात है।
रिपोर्टर – गीता और शिवदेवी
