जिला चित्रकूट, ब्लाक कर्वी, कस्बा कर्वी अउर इलाहाबाद रोड के किनारे मानिकपुर का जाये वाली बस अउर जीप ठाढ़ होत हवै। यहिसे दुकानदारन का दुकान मा ग्राहक न आवैं के समस्या से जूझैं का परत हवै। हिंया बस अउर जीप न ठाढ़ होय का चाही या कहत हवैं हिंया के दुकानदार।
सनत जायसवाल का कहब हवै कि बस अउर जीप ठाढ़ होइ जात हवै। यहिसे हमार दुकान मा ग्राहक नहीं आवत हवैं। हम दुकानदार दुइ रुपिया कमाये खातिर दिन भर अपने दुकान मा बइठ़े रहित हन। हिंया से बस अउर जीप ठाढ़ होय मा रोक लागै का चाही। नहीं तौ अगर यहिनतान बस अउर जीप ठाढ़ होत रहिहैं तौ हम दुकानदार भूखन रहैं के कगार मा पहुंच जइबे।
चित्रकूट के सहायक परिवहन अधिकारी के.डी.सिंह का कहब हवै कि हुंवा प्राइवेट बस अड्डा बनवावैं खातिर कत्तौं जघा नहीं मिलत आय। बस अड्डा बनवावैं खातिर जघा मिली तौ बस अड्डा बनवावा जई।
रिपोर्टर – तबस्सुम, नाजनी रिजवी