मन्टोरिया
जिला बांदा, ब्लाक कमासिन, गांव जमरेही, मजरा बंथरी। हेंया के मन्टोरिया 26 मार्च 2014 का डी.एम. आफिस के सउहें बइठे ड़ी.एम. का इंतजार करत रहै। पूछै मा पता लाग कि छह साल पहिले मनसवा के बिजली से मउत होइगे रहै। अब यतने दिन बाद मुआवजा के नाम पचास हजार रूपिया के चेक आई है। चेक मा डी.एम. से दसखत करावै खातिर बइठ हैं।
मन्टोरिया बतावत है कि मोरे दुई छोट बच्चा हैं। छह साल होइगे बारिस का समय रहै मनसवा फूलचन्द्र हार से चारा लइके घरै आवत रहै। अचानक रास्ता मा बिजली का तार गिरैं से दरे मा मउत होइगे। यहिके पूरे कागज तैयार होइ के लखनऊ तक पहुंच गें है। बिजली विभाग वाले पांच लाख रूपिया का मुआवजा दे खातिर कहिन रहैं। बीस हजार रूपिया मनसवा के दिन तेरही खातिर मिला रहै। अब यतने दिन होय के बाद भी पूरा रूपिया नहीं मिला पचास हजार के चेक आई है। अगर पूरा रूपिया इकट्ठा मिल जात तौ नींक रहै।
बिजली विभाग के अधिशाषी अभियन्ता कमलेश कुमार कहत हैं कि जबै फूलचन्द्र के बिजली से मउत भे रहै। वा समय पचास हजार रूपिया मुआवजा दें का नियम रहै। जउन वहिका मिल चुका है।
