चुनाव के दिन इनतान का रहा नजारा

वोट डालैं खातिर लाइन मा लाग मड़ई

30 अप्रैल 2014 का बांदा जिला के जनता नेतन के किस्मत पेटी मा बंद कई दिहिन। आपन सबै काम काज छोड़ के मड़ई बढ़चढ़ के भागीदारी निभाइन। शाम छह बजे तक मा लगभग पचपन प्रतिशत वोट परब बतावा गा है।
मतदान केन्द्र-आदर्श बतरंग इण्टर कालेज बांदा-अलीगंज के ब्रज गोपाल बतावत है कि भाग संख्या 78 मा बहुतै शान्ती व्यवस्था के साथै वोट डाले गे हैं। गायत्री नगर से आई राजश्री बताइस कि हम कउन पार्टी का वोट दीन है या बतावब जरूरी निहाय। चाहित है कि देश मा नींक नेता बनै जउन देश का विकास करै। मेहरियन का सुरक्षा दे।
बी.एल.ओ. रेखा गुप्ता बतावत है कि या दरकी लोकसभा चुनाव मा सबके घर-घर पर्ची दुई दिन पहिले ही पहुंचा दीन गई रहैं। या मारे मड़इन का कउनौतान के परेशानी नहीं भे आय।
मतदान केन्द्र-भवानीपुर पूर्व माध्यमिक विद्यालय भाग 1, पदारथपुर के पूर्व माध्यमिक विद्यालय भाग 1 अउर जौहरपुर के पूर्व माध्यमिक विद्यालय भाग 1- भवानीपुर प्राथमिक विद्यालय भाग एक, पदारथपुर के पूर्व माध्यमिक विद्यालय भाग एक अउर जौहरपुर के पूर्व माध्यमिक विद्यालय भाग एक मा मतदान भा। भवानीपुर के वोटर पांच सौ आठ हैं जेहिमा तीन सौ सात लोग मतदान करिन। पदारथपुर मा 1333 वोटर मा कुल 646 वोटर वोट डालिन। यहिनतान जौहरपुर मा कुल 15 हजार वोटरन मा कुल 7 हजार वोट पड़ी है।
मतदान केन्द्र-पूर्व माध्यमिक विद्यालय महुआ- पूर्व माध्यमिक विद्यालय महुआ मा तीन बूथ बनाये गें रहै। शान्ती से चुनाव निपट गा है। हेंया के लोग कहिन कि छाया अउर पानी के व्यवस्था होय से मड़इन का धूप नहीं जान परी आय।
मतदान केन्द्र-जे.पी. इण्टर कालेज बबेरू- जे.पी. इण्टर कालेज बबेरू मा बूथ बनावा गा रहै। हेंया मड़ई बहुतै खुशी के साथै वोट डालैं आये रहै, पै पर्ची न मिलै से वोट नहीं डाल पाइन।
मतदान केन्द्र-प्राथमिक विद्यालय महादेवन चित्रकूट-प्राथमिक विद्यालय महादेवन मा छाया अउर पानी के व्यवस्था न रहैं से मड़ई घण्टन धूप मा तपत रही गें।