चित्रकूट जिले में ऐसी लगी आग कि दो दिन लग गये बुझाने में

जिला चित्रकूट, ब्लाक पहाड़ी, गांव गड़ौली हिंया 10 अप्रैल का आगी लाग गें हवै।जेहिमा 240 घर जल गें हवैं जेहिमा से 108 घर ज्यादा जले हवैं पीड़ितन का छह छह हजार के चेक मिले हवै जउन किसानन का अनाज जला हवै वहिकर मुआवजा मण्डी समिति जांच के बाद देई। पीड़ितन का 95 हजार का मुआवजा दे का कहा गा हवै आगी लागे का कारन पता नहीं चला आय।
मनोज बताइस कि हमार घर जल गे हवै जेहिसे हमार बहुतै नुकसान भा हवै। सुमित्रा बताइस कि एक महीना बाद मोर बिटिया के शादी हवै। शादी का पूर सामान बेड, आलमारी, बक्सा, सोने का झूमक, माला, बेसर सब गहना जल के राख होइ गें हवैं ।
पूनम बताइस कि हमार जेत्ते गहना रहै सब जल गें हवै। झागल, बिछुवा,बेसर, झूमक हमार लगे सब गहना रहै, आगी का सब गहना चुर गे हवैं। अनंत कुमार त्रिपाठी बताइस कि जबै आगी लाग रहै तबै तहसीलदार अउर एस.डी एम सब आये रहै। जउन मड़इन घर जले हवै उनकर चेक नहीं दीन गा आय जिनके घर नहीं जले आही उनका 10-10 हजार के चेक दिहिन हवैं हम चार परिवार का कुछौनहीं दीन आही।
राजापुर तहसीलदार का कहब हवै कि पीड़ितन का कपड़ा अउर खाना खातिर रुपिया दई दीन गा हवैं। जांच के बाद मुआवजा दीन जई।
भाजपा विधायक चन्द्रिका प्रसाद बताइस कि नियम बदले का चाही आंशिक रूप से जले घरन का भी 45 हजार तक का मुआवजा दे का चाही सांसद प्रतिनिधि सुशील द्विवेदी का कहब हवै कि सांसद अधिकारिन का जांच करै का कहिन हवैं वहिके बाद मुआवजा दीन जई।

रिपोर्टर- नाजनी और सहोद्रा

14/04/2017 को प्रकाशित