जिला चित्रकूट, ब्लाक मऊ, गांव ताड़ी के मड़ई कोटेदार के लगे बार-बार जात हवैं पै कोटेदार गल्ला नहीं देत आय।कोटेदार राजेश प्रसाद का कहब हवै कि आंनलाइन करावें मा लगभग सत्तर मड़इन का नाम कट गा हवैं यहै कारन राशन नहीं मिलत आय। अधिकारी उंई मड़इन के भी सूची बनावत हवै।
ज्ञानचंद का कहब हवै कि पहिले राशन मिलत रहै पै पिछले तीन महीना से राशन नहीं मिलत आय। यहिसे हमार गांव के लगभग एक सौ साठ परिवारन कास गल्ला नहीं मिलत आय। हमरे लगे राशनकार्ड, टोकन सब हवै। या समस्या के बारें मा एसडीएम का दुइ दरकी लिखित दरखास देनें हौं पै हमार सुनवाई नहीं होत आय। वाल्मीकि का कहब हवै कि हमें जुलाई से राशन नहीं मिला आय। कोटेदार हमें गल्ला नहीं देत आय, सब बेंच लेत हवै।
कुसुमकली बताइस कि कोटेदार कहत हवै कि चाहे एसडीएम का बोलाव चाहे पुलिस का, हम तुम्हें राशन न देबै। छोट-छोट बच्चा हवै राशन मिल जात रहै तौ खाय का होइ जात रहै। सरसों के तेल मा सब्जी बनाइत हवै अउर वहिका जलाइत भी हवै। सुबराती का कहब हवै कि हम चाहित हवै कि कोटेदार का हटावा जायें काहे से व हमें राशन नहीं देत आय अउर डंडा से मारे के धमकी देत हवै।
रिपोर्टर-सुनीता देवी
published on Dec 26, 2017
