चित्रकूट जिले में आज हुआ मतदान, महिलाओं की संख्या उम्मीद से कम

22 नवम्बर का नगरपालिका के चुनाव मा वोट डालें गे हवै। जेहिमा मेहरियन से ज्यादा आदमी के संख्या ज्यादा हवै। सुबेरे के समय मेहरिया काम मा लाग रहत हवै यहै कारन उनकर संख्या कम हवै। सुबेरे साढ़े सात बजे से बारह बजे तक बीस प्रतिशत वोट पड़ चुके हवै कुछ मड़ई पर्ची न मिलें के कारन वापस लउट गें हवैं यहिमा निर्वाचन विभाग के लापरवाही बताई जात हवै।
पोलिंग एजेन्ट नन्द कुमार बताइस कि अबै तक पचास पर्ची कट चुकी हवै। जेहिमा आदमी के संख्या ज्यादा हवै। लगभग बीस पच्चीस मड़ई पर्ची न मिलें के कारन लउट गें हवै।
रामशक्ति बताइस कि मोहिका अबै पर्ची नहीं मिली आय।
साहिबा बताइस कि मोर महतारी बाप के पर्ची मिल गें हवै अबै मोर पर्ची नहीं मिली आय रफीद अहमद बताइस कि मैं हर दरकी वोट डालें आवत हौं या दरकी मोर नाम नहीं आय मोहिका वोट डालत चालिस साल हवै।
पोलिंग एजेन्ट राहुल सोनी बताइस कि वार्ड नम्बर ग्यारह मा लगभग दुई हजार वोटर हवै हिंया मेहरिया आदमी दूनौ बराबर वोट डालें आयें हवै।
पोलिंग एजेन्ट विष्णु कुमार बताइस कि अबै तक एक सौ तिरानबे आदमी अउर एक सौ सत्तर मेहरिया वोट डाल चुके हवै कुल नौ सौ पन्द्रह वोटर हवै।
राजापुर मा धीरे धीरे काम होय के कारन मड़इन का लाइन लगावें का पड़ा हवै।
रामनारायण अउर अलम्मादीन बताइन कि हम बिना नहायें धोवें भूखे पियासे दुई घंटा से लाइन मा बइठ हन।
संतोष बताइस कि मड़ई हिंया बहुतै खुशी के साथ मतदान करै आये हवै हिंया का महौल बहुतै शांत हवै।
एस डी एम् राममूर्ति त्रिपाठी का कहब हवै कि बहुतै शांत तरीका से मतदान होत हवै अबै तक तीस प्रतिशत वोट पड़ चुके हवै।

बाइलाइन-खबर लहरिया ब्यूरो

22/11/2017 को प्रकाशित