जिला चित्रकूट, ब्लाक मऊ के प्राथमिक विद्यालय मुसई का डेरा के दीवाल जर्जर अउर बाउन्ड्री टूट पड़ी हवै। स्कूल के फर्श भी इनतान के हवै कि बच्चन के गोड़ छिल जात हवैं। मऊ ए.बी.आर.सी. ललक कुमार पांडे का कहब हवै कि स्कूल के बिल्डिंग के जांच करै के बाद नई बिल्डिंग बनवाई जई।
मनोज कुमार निषाद का कहब हवै कि स्कूल के दीवार मा जउन दरार हवैं वहिमा सांप, विषखापर अउर बिच्छू रहत हवैं, कइयौ दरकी मारा हवै। यहिसे बच्चा डेरात हवैं। वइसे तौ हर मौसम मा सांप, बिच्छू निकलत हवैं, पै बरसात मा ज्यादा निकलत हवै। स्कूल के बच्चा राजाराम अउर रोशनी का कहब हवै कि स्कूल के दीवाल टूट हवै, तौ डेर लागत हवै कि कत्तौ गिर जाये तौ हम दब जइबै। हिंया के फर्श भी बहुतै खराब हवै, बइठै मा धूल लाग जात हवै। रसोइया शशिकला बताइस कि बरसात मा खाना बनावै खाना मा पानी पड़ जात हवै।
शिक्षामित्र पुष्पा सिंह का कहब हवै कि स्कूल मा तिहत्तर बच्चा पढ़त हवैं। एक से पांच तक के बच्चन का दुइ कमरा मा बइठा के पढ़ाइत हवै, तौ परेशानी तौ होत हवै, पै कउनौतान पढ़ावा जात हवै। प्रधान कमलेश कुमार का कहब हवै कि स्कूल के मरम्मत खातिर जबै रुपिया आ जई तौ मरम्मत करा दीन जई।
भाजपा के महिला मोर्चा जिला संयोजक ममता तिवारी का कहब हवै कि स्कूल के हालत बहुतै खराब हवै। डीएम अउर बी.एस.ए. का स्कूल के मरम्मत खातिर ध्यान देवा चाही।
रिपोर्टर- सुनीता देवी
