चित्रकूट के कोल मजरा, बरगढ़ और गोइय खुर्द के लोग अन्ना जानवर से परेशान

जिला चित्रकूट, ब्लाक मऊ, क़स्बा बरगढ़,गांव कोलमजरा अउर गोइया खुर्द अन्ना जानवरन से मड़ई या समय बहुतै परेशान हवैं। मड़ई रात दिन बराबर अन्ना जानवरन का ताकत हवैं। यहिके बादौ अन्ना जानवर उनकर फसल का चर डारत हवैं। मड़ई अन्ना जानवरन का रोकै खातिर 24 अगस्त का बरगढ़ थाना मा लिखित दरखास दिहिन हवैं।
बरगढ़ कस्बा के अनिरुद्ध कुमार दुबे का कहब हवै कि गांव के रहैं वाले संतोष प्रजापति के दुइ भइंस मोर धान का चर डारिन हवैं। मैं संतोष के घर उलहना दें खातिर गे रहौं तौ वा उल्टा मोहिका गाली देत रहै अउर ऊपर से धमकी देत रहै कि ज्यादा करिहै तौ तोहिका जान से मार देइबे।
तेरसिया का कहब हवै कि अपने जमीन मा तिल बोये हौंं। हिंया अन्ना जानवरन का कारन से मोर तिल नहीं बच पावत हवैं। मै अन्ना जानवरन का अपने घर के काम का छोड़ के ताकै का परत हवै। अन्ना जानवरन के चक्कर मा रात भर सोये का नहीं मिल पावत हवै। अन्ना जानवरन का रोकै खातिर प्रधान सुशीला देवी डिग्गी पिटवा दिहिस हवै कि मड़ई अपने जानवरन का बांध के राखै। यहिके बादौ मड़ई जानवरन का खुला छोड़े हवैं। विनय कुमार कहिस कि अब अन्ना जानवरन खातिर डी.एम. अउर एस.डी.एम. का दरखास देइबे। संतोष कहिस कि धोखे से भइंस अनिरुद्ध कुमार के खेत मा चली गें रहैं। बरगढ़ थाना का पुलिस वाला सुनील कुमार कहिस कि जांच मा जउन सही होइ वा कीन जई।

रिपोर्टर- सुनीता देवी 

26/08/2016 को प्रकाशित
अन्ना जानवरों से खेतों को हुआ नुक्सान
चित्रकूट के कोल मजरा, बरगढ़ और गोइय खुर्द से शिकायत करने पहुंचे लोग