घोषित होय सूखा

अस्थौन गांव खे किसान

जिला महोबा, ब्लाक चरखारी, गांव अस्थौन। सूखा पूरे महोबा जिला में का पूरे बुन्देलखण्ड में साफ नजर आउत हे, पे सरकार सूखा घोषित करें खा नाम नई लेत आय। एई से किसान आदमियन ने 25 अगस्त 2014 खा सड़क में जाम लगा के सूखा घोषित करायंे ओर ओलावृष्टि की चेक दिवायें खे मांग करी हे।

अस्थौन गांव के राजबहादुर, रामप्यारी ओर शुरमारानी ने बताओ कि अब बारिश होय की सम्भावना बिल्कुल खतम हो गई हे। निर्पत ओर बीरबल बताउत हें कि ई साल जेसे-तेसे गुजर हो जेहे, पे अगली साल का खैबी। एसई पनवाड़ी ब्लाक के सैकड़न किसान 25 अगस्त 2014 खा महोबकण्ठ ओर तेइया गांव के बीच झांसी रोड़ में सूखा घोषित करें ओर फरवरी 2014 में भई ओलावृष्टि की चेक न मिले खा लेके जाम लगाओ हे।
रामसेवक, सन्तराम ओर नन्दकिशोर बताउत हें कि फरवरी 2014 में भई ओलावृष्टि से रबी की फसल खराब हो गई हती। अब सरकार सूखा भी नई घोषित करत आय।
कुलपहाड़ एस.डी.एम. मोहम्मद रिजवान बताउत हें कि पूरी तहसील में 72 गांव की चेक बजट न होय खे कारन नई आई हें। विधानसभा उप चुनाव के बाद सब आदमियन खा चेक दे दई जेहे।
ए.डी.एम. सुरेन्द्र कुमार ने बताओ कि जभे तक राज्य सरकार केती से सूखा घोषित न होहे तभे तक हम जिला में सूखा घोषित नई कर सकत हें।