घर गिरावैं के देत धमकी

जिला बांदा, ब्लाक बडोखर खुर्द, गांव मौदहा। या गांव के पन्द्रह परिवार के मड़ई मिल के 2 नवम्बर 2015 का एस.पी. का दरखास दई के घर गिरावैं के धमकी दें वाले के खिलाफ कारवाही करैं के मांग करिन हैं। एस.पी. कारवाही का भरोसा दिहिन हैं।
शिरोमन, चुनकाई अउर राममुरत का कहब है कि चालिस साल पहिले कुबेर पुत्र मदनमोहन जमीन खरीद के घर बना लिहिस रहै। जमीन के गाटा सख्या 066 है। मोहल्ला का मदन मोहन गुप्ता अउर हमरे बीच मा जमीन का मुकदमा हाईकोर्ट से चलत है। अब मदनमोहन एक हप्ता से रोज शाम के मोहल्ला मा गुंडन के साथैं पहुंच के गाली गलौज करत है। जबरन घर से निकाल के घर गिरावैं चाहत है। अफवाह फइलाये है कि मैं हाईकोर्ट से मुकदमा जीत गये हौं। या मारे घर गिरावैं चाहत हौं। मदन मोहन का लड़का सबसे चार-चार लाख रूपिया मांगत हैं। हम गरीब मजदूर मड़ई यतनी बडी रकम कहां से पाई। अगर हमरे मामला मा कारवाही न भे तौ हम लोग आत्मदाह कई लेबे।
मदनमोहन का कहब है कि वा जमीन मोर पुस्तैनी जमीन आय। या मारे मैं मुकदमा लड़त हौं। अब मुकदमा जीत भी गये हौं। या मारे घर गिरावैं चाहत हौं।
एस.पी. आर.पी. पाण्डेय का कहब है कि मामला गम्भीर है। जांच कइके कारवाही कीन जई। वइसे भी या मामला हाईकोर्ट मा चलत है, पै घर नहीं गिराये जा सकत आय।