ग्राम सचिवालय कै भवन जर्जर

जिला अम्बेडकर नगर, ब्लाक कटेहरी, गांव गौरा बसंतपुर। हिंआ आठ साल पहले बारह लाख के लागत से बना रहा ग्राम सचिवालय कै भवन एकदम जर्जर होय चुका बाय। खिड़की दरवाजा चारदीवारी सब टूट चुका बाय।
गांव कै मनइन वहि सचिवालय मा कन्डा धरत हइन। कबहूं कबहूं जानवर भी वहीं मा बांध दियाथिन। बारह लाख के लागत पै पानी फिर जात बाय। यहमा सरकारी कउनौ काम नाय हुवत। भवन एकदम जर्जर होइगै बाय। चारौ तरफ से झाल झंखाड़ से घिरा बाय।
प्रधान राम अकबाल वर्मा बताइन कि पूर्व प्रधान के प्रधानी मा बना रहा। भवन जर्जर हुवय के कारण यकै प्रयोग नाय होय पावत बाय। आवश्यक बजट कै प्रबन्ध कराय के यकै मरम्मत कराय जाये।
ए.डी.ओ. पंचायत राजबहादुर सिंह बताइन कि पंचायत के सचिवालय कै देखभाल कै जिम्मेदारी पंचायत सचिव अउर प्रधान कै हुवय। ग्राम पंचायत कै बैठक करावैं यकै प्रस्ताव लावै। तब यकरी खातिर बजट कै व्यवस्था कै जाये। यकरे बाद दुवारा यकै मरम्मत होये।