गोली मार के हत्या का आरोप

जिला बांदा, ब्लाक कमासिन, गांव लोहरा। हेंया 3 जनवरी का कमल सिंह के औरत राधा के मउत का मामला सउहें आवा हैं। औरत के मइके वाले 5 जनवरी का बबेरू कोतवाली मा दहेज हत्या के रपट लिखाइन हैं।
राधा का बाप हरीराम अउर महतारी संतोष रानी कहत हैं कि हम सागर जिला के गांव नन्नी देवी के रहैं वाले आय। हम आपन लड़की राधा के शादी लोहरा गांव के कमल सिंह साथै चार साल पहिले करे रहन। शादी के बाद पांच लाख रूपिया नगद दहेज के नाम से मांगै लाग। हम न दई पावै के मजबूरी बतावा तौ लड़की का मारपीट करैं लाग। 3 जनवरी का गोली मार के हत्या कई दिहिन। हम आयेन तौ गांव लोहरा मा न मिले। कमासिन थाना मा भी न मिले। चोरी चोरी पोस्टमार्टम खातिर बांदा भेज दिहिन कमासिन थाना मा रपट लिखावैं गावा तौ पुलिस रपट नहीं लिखिन। 5 जनवरी का एस.पी.के पास दरखास दीन। एस.पी. के आदेश से कमासिन थाना मा रपट लिख गे है। हमैं पता चला कि पोस्टमार्टम मा 315 बोर के दुई गोली निकरी हंै। साथैं ससुराल वालेन के ऊपर आरोप है कि उंई थाना मा कारवाही न करैं खातिर सवा लाख रूपिया पुलिस का दई दिहिन हैं। या मारे रपट लिखैं के बाद भी कारवाही नहीं भे आय।
कमासिन थाना का एस.ओ. हरिचरण सिंह का कहब है कि 5 जनवरी का दहेज अधिनियम धारा 498ए, दहेज हत्या के धारा 304बी अउर 3/4 लाग है। जल्दी ही गिरफ्तार कीन जई।