जिला बांदा। गर्भवती औरतन अउर बच्चन का कुपोषण से बचावैं खातिर राज्य पोषण मिशन के तहत गोद लीन गे गांवन मा 28 अप्रैल से 12 मई तक औरतन अउर बच्चन का गर्म खाना दीन जाय का कार्यक्रम चलत है। जइसे कि नरैनी ब्लाक के पुकारी गांव मा 10 मई का आगंनबाड़ी केन्द्र मा खाना खात देखैं का मिला। राज्य कुपोषण योजना के तहत कुपोषण से बचावैं के खातिर या योजना का शुभारम्भ कीन गा। या योजना लम्बे समय से चलत आय। अबै तक कुपोषित बच्चन का पुष्टाहार दें के साथै उनके चिकित्सा व्यवस्था जिला अस्पताल मा कराई जात रही है। अब हर आंगनबाडी केन्द्र मा रोजाना गर्भवती औरतन अउर कुपोषित बच्चन का गर्म खाना दीन जई। नरैनी ब्लाक, गांव पुकारी। भाग 2 के आंगनबाडी सरोज कहिस कि चाहे जेत्ता बदल जान, पै सब के सोच नहीं बदल सकत। लोग छुआ छूत का भेद भाव करत है। सर्वे के दौरान 7 गर्भवती औरतै रहैं, पै आज एक भी नहीं आई आय। मड़ई कहत है कि हम धूप मा अपने घर का काम छोड़ के न आ पइबे सूखा खाना बांट देव। लोगन का फोन करित हन,पै लोग बहाना बना देत हैं कि एक फल अउर खाना खातिर को जाय। धर के बड़े लोग आवैं भी नहीं देत आय। यहिसे मोरे केन्द्र मा आज कुपोषित बच्चन के संख्या 6 अउर औरतन के जीरो है। पुकारी सुपरवाइजर कहिस कि सुबेरे से आ के बइठ जात हन आंगनबाड़ी अउर सहायिका चार चार दरकी बोलावत है, पै न तौ सोच बदलत न बच्चन का देखावत आय। यहै कारन बांदा जिले मा यतने बच्चा कुपोषण का शिकार हैं। जिला कार्यक्रम प्रभारी अधिकारी अर्जुन सिंह कहिन कि या कार्यक्रम अबै गोद लीन गे गांव मा चलावा जा रहा है। यहिके बाद अउर गांव मा चलाई जई।
रिपोर्टर – गीता