जिला बांदा। भारत सरकार कइत से 1 मई से चलाई गे रसोई गैस कनेक्शन योजना का लइके लोगन मा बहुतै हड़कम्प मचा है। लोगन का आरोप है कि सरकार सेत मा गैस कनेक्शन देत है, पै एजेन्सी वाले साढ़े पन्द्रह सौ रुपिया लेत हैं। जबकि गैस एजेन्सी वाले कहत हैं कि सरकारी नियम मा इं रूपिया ले का आदेश है।
नरैनी ब्लाक, कस्बा कालिंजर। हेंया के सुरेश अउर भूरा का कहब है कि सरकार गरीब मड़ई खातिर सेत मा गैस कनेक्शन दें का ऐलान करिस रहै। अब गैस एजेन्सी फारम भरैं मा साढ़े पन्द्रह सौ रुपिया लेत हैं। अगर हम गरीब लोगन के पास यतना रूपिया खर्च करै का होत तौ अबै तक पहिले गैस खरीद के घरै आ गे होत।
नरैनी ब्लाक, नेढूवा गांव का बच्चा कहत है कि हमरे लगे भी अन्त्योदय राशन कार्ड है अउर हम गैस का फारम भी भर के जमा कीन हैं। पहिले पता नहीं रहै कि रुपिया लागैं का है। अब रुपिया के मांग कीन जात है।
रिचा गैस ऐजन्सी कालिंजर मा बात भे तौ होंआ के मालिक का कहब है कि 2011 के सर्वे वाली सूची जउन हमका शासन से मिली है वहिमा जेतने लोगन के नाम हैं सब के फारम भरे जात हैं। उनके पास चाहे जउन राशन कार्ड होय, पै साढ़े पन्द्रह सौ रूपिया लीन जात है। वहिमा चाहे कउनौ लोन करा ले चाहे नगद जमा कइ दे। अगर नगद जमा होई जात हैं, तौ एक सौ सैंतिस रूपिया तुरतै उनके खाता मा वापस आ जई। अगर उंई लोन करवइहैं तौ खाता मा रूपिया न आई।
रिपोर्टर – गीता