गेंदा समझके पटका बम, तीन घायल

जिला अम्बेडकर नगर, ब्लाक टांण्डा गांव ददनापुर। हिंआ 19 मई 2016 का घर से थोड़ी दूर खेलै गये लड़िकै बम से घायल।
गांव कै राजितराम बताइन कि हमार लड़की कल्पना आठ साल बेटवा आदर्श छह साल अउर सुरजीत कै बेटवा विजय दस साल रोज के तरह वहू दिन गांव के बाहर नदी किनारे बाग मा खेलै गा रहिन। बगल मा विजय वर्मा कै राइस मील के पीछे झाल बाटै। वही झाली मा लड़िकै खेलै पहुंच गइन। वहीं सुतरी से लपेटा एक बम पड़ा रहा। गेदहरै वका गेंदा समझके उठाय लिहिन। अउर जब वका जमीन पै पटकिन तौ बहुत तेज विस्फोट भै। गांव वाले आवाज सुनिके दौरिन तौ देखिन तीनौ गेदहरै घायल पड़ा रहिन। तुरन्त गांव वाले गेदहरन का टांडा सामुदायिक स्वास्थ्य केन्द्र लै गइन। वहिसे प्राथमिक उपचार कइके जिला अस्पताल रिफर कै दिहिन। इलाज चलत बाय। कल्पना के पेट महसे एक कील अउर लोहे कै एक नट निकलागै। आदर्श अउर कल्पना कै हालत गम्भीर हुवय से राजधानी टामा सेन्टर रिफर कै दिहिन। एसपी अजय कुमार सिंह अउर एस.एस.पी. राहुल राज जिला अस्पताल पहुंचके हालचाल लिहिन।
एस.एस.पी. राहुल राज बताइन कि मामला कै छानबीन कीन जात बाय। बम जंगली सुअर अउर नीलगाय का डरावै के ताई रखा गै रहा।