बेंदाघाट का हैण्डपम्प
जिला बांदा ब्लाक तिन्दवारी, कस्बा बेंदाघाट अउर बड़ोखर खुर्द ब्लाक का गांव डिंगवाही। बेंदाघाट चैराहा का हैण्डपम्प एक साल से खराब है। यहिसे यात्री पानी खातिर परेशान हैं। यहिनतान डिंगवाही गांव वाले बताइन की छह महीना से सप्लाई का पानी नहीं आवत आय, पै प्रधान कउनौ ध्यान नहीं देत आय।
बेंदाघाट के दुकानदार राजू, राकेश, राजेश का कहब है कि दिन भर हम पियासे बइठ रहत हन। दुकान छोड़ के आधा किलो मीटर दूरी पानी पियैं जाय का परत है। दिन भर मा कइयौ दरकी मड़ई हैण्डपम्प तक आवत हैं अउर हैण्डपम्प भड़भड़ा के चले जात हैं। यहिसे लागत है कि हैण्डपम्प कबै बन जाय।
पंचायत मित्र नकुल सिंह का कहब है कि आठ हैण्डपम्प रिबोर खातिर जल संस्थान का पिछले साल दीन गे हैं। मार्च 2014 मा पास होई गे हैं अउर प्रधान के अंडर मा आ गे हैं। अब चार हैण्डपम्प का रिबोर होइगा है बाकी का रिबोर कीन जई।
डिंगवाही का रविकरन अउर राजा बताइन कि छह महीना से सप्लाई का पानी नहीं आवत आय। जानवरन का पानी पियावैं गंदा नाला लई जाय का परत है। नाला का पानी गंधात है या मारे जानवर ज्यादा पानी नहीं पियत आय। तीन हजार की आबादी है। पूरे गांव वाले परेशान हैं। प्रधान से दसन दरकी सप्लाई वाले नल बनवावैं खातिर कहे हन, पै प्रधान ध्यान नहीं देत आय। छह साल से बनी टंकी आठ महीना से प्रधान के अण्डर मा है।
प्रधान केशकली का कहब है कि सप्लाई वाला नल बनवावैं खातिर तीन महीना पहिले सचिव का लिख के दीन गा है। सचिव के तबियत खराब है। या मारे अबै तक या समस्या जइसे का तइसे परी है। जबै सचिव नींक होई जई तबै इं नल बनवाये जइहैं। बी.डी.ओ. आर.डी. यादव कहिन कि एक हफ्ता मा नल अउर पानी चालू करवा दीन जई।