गर्मी अउतै पानी के समस्या

जिला बांदा, ब्लाक नरैनी, कस्बा अतर्रा, बड़ोखर खुर्द  ब्लाक का कस्बा भूरागढ़ अउर बबेरू ब्लाक का गांव मझिला। इं तीनौ गांवन के मड़ई पानी के समस्या का लइके परेशान हैं।
अतर्रा कस्बा के राजकीय चिकित्सालय मा दुई हैण्डपम्प है एक खराब है। दुसरे मा घन्टा भर खीचैं के बाद पानी निकरत है। दवाई करावैं आय मरीज ललित, जगरानी अउर पप्पू बतावत हैं कि या अस्पताल मा रोज का हजारन मड़ई दवाई करावैं आवत है। देखौ का तौ दुई हैण्डपम्प  हैं।  पानी खातिर कउनौ निहाय। अगर गर्मी मा भी यहै हाल रहा अउर हैण्डपम्प न सुधरे तौ मरीजन का बहुतै मुश्किल झेलै का परी।
अतर्रा राजकीय चिकित्सा प्रभारी अधिकारी प्रदीप सिंह कहत हैं कि हैण्डपम्प बनवावैं खातिर जल संस्थान का सूचना दीन हैं। अब बनवा दीन जई। भूरागढ़ के कल्ली अउर मीना बतावत  हैं। कि हमरे हेंया का हैण्डपम्प एक महीना से खराब है। या हैण्डपम्प से हजारन मडई का निस्तार होत है, पै प्रधान कउनौ ध्यान नहीं देत आय। हैण्डपम्प का पानी उतर जात है। जबै हैण्डपम्प चलावत चलावत हाफी आवैं लागत है। तबै पानी निकरत है। प्रधान रामकिशुन कहत है कि हैण्डपम्प खराब होय के जानकारी मोहिका नहीं रही। अब मिली है, तौ बनवा दइहौं।
यहिनतान मझिला गांव के मंगलवा, रामकृपाल अउर बेसनिया बतावत है कि हमरे दलित बस्ती का हैण्डपम्प चार महीना से खराब है। आधा किलो मीटर दूर पानी खातिर जाय का परत है।
प्रधान नीलम का मनसवा महेश सिंह कहत है कि हैण्डपम्प खराब है, तौ मिस्त्री बुला के बनवा दीन जई।