खुली मीटिंग मा शामिल मड़ई
जिला बांदा, ब्लाक तिन्दवारी, गांव पदारथपुर। हेंया 4 दिसम्बर 2013 का गांव के प्राइमरी स्कूल मा खुली मीटिंग भे रहै। मीटिंग मा गांव का प्रधान, जनता अउर अधिकारी शामिल रहं। कुछ-कुछ बातन का लइके जनता अउर प्रधान के बीच बहुतै लड़ाई भे है।
गांव के खुली मीटिंग मा इकट्ठा भे जनता कहिस कि जउन साठ साल उमर के मड़ई हैं उनका कडनौ सरकारी लाभ नहीं मिलत आय। यहिसे प्रधान अउर सचिव से हम, विधवा वृ़द्धा अउर रानी लक्ष्मीबाई योजना के तहत मिलैं वाली पेंशन के लिस्ट हम लोग मांगत हन। या बात सुन के सचिव छेदीलाल अउर प्रधान सपना का मनसवा राजाराम कहिस कि पेंशन के लिस्ट हमरे पास निहाय। लेखपाल के पास रहत है। या बात के जानकारी जनता लेखपाल से भी करिस। तबै लेखपाल कहिस कि पूरी लिस्ट प्रधान के पास होत है। यहै बात का लइके खुली मीटिंग मा सचिव, प्रधान अउर आम जनता के बीच बहुतै विवाद भा है।
सचिव छेदीलाल बताइस कि बी.पी.एल. सूची मा एक सौ बीस लोग हैं जेहिका वृद्धा पेंशन मिलत है। सचिव के बात से जनता का शांती निहाय।