खराब ईंटा लागै से गांव वाले नाराज

जिला अम्बेडकरनगर, ब्लाक कटेहरी, गांव गौरा बसन्तपुर। हिंआ आर.सी.सी. रोड बनै खातिर सीमेंट कै ईट लागै खातिर 23 अक्टूबर कै दुई ट्रक आय रहा। घटिया ईट देखै से गांव वाले नाराज होई कै ईटा उतारै से मना कई दिहिन।
गांव कै मनई रामनरेश शर्मा, पूजन वर्मा, हरिओम, प्रधान प्रतिनिधि रमेश वर्मा अउर बडे़ बाबू कमलेश सब कै आरोप बाय कि करोडा़े रूपया कै घेटाला भै बाय। आर.ई.एस. विभाग द्वारा इंटर लाकिंग कै स्वीकृत मिली रही। अट्ठारह सौ मीटर सड़क गांव के अन्दर बनै खातिर पास भै बाय। कुछ दूर तौ अच्छा ईटा लाग बाय। वकरे बाद खराब ईटा लगाई जाए लाग। गांव वाले विरोध करिन लकिन ठेकेदार नाय मानिन। विभाग मा भी सूचना दिहिन केहू अधिकारी, कर्मचारी ध्यान नाय दिहिन। 23 अक्टूबर कै गांव वाले प्रदर्शन कई कै काम रूकवाए दिहिन। सूचना पाइकै भींटी तहसील कै एस.डी.एम. अउर सदर एस.डी.एम. आईन। गांव वालेन से बात कइके जांच करावै कै आश्वासन दिहिन। ठेकेदार से खराब ईटा न लगायके गुणवत्ता पूर्ण ईटा लगवावै का कहिन।