कोटेदार के खिलाफ करिन शिकायत

जिला चित्रकूट, ब्लाक कर्वी, गांव अकबरपुर। हिंया के मड़इन का आरोप हवै कि कोटेदार विनोद तीन महीना से सफेद अउर लाल राशन कार्ड मा गल्ला नहीं देत आय। यहिसे 8 अप्रैल का जिला पूर्ति विभाग अउर कर्वी एस.डी.एम. रजनीश कुमार मिश्र का लिखित दरखास दीन गे हवै। या समस्या से लगभग साठ मड़ई जूझत हवैं।
गांव के सावित्री, मीरा, कल्ली कलमतिया अउर मंजू आपन राश्न कार्ड लीेने ए.डी.एम.आफिस के सउहें ठाढ़ रहैं। उनसे पूछैं मा उंई बताइन कि हमरे कउनौ के सफेद कउनौ के लाल राशन कार्ड बने हवैं। हमरे एकौ बिसुवा जमीन नहीं आय। सरकार कइती से राशन कार्ड तौ बने हवैं, पै कोटेदार गल्ला नहीं देत। यहिसे एक एक दाना का तरसित हन।
कोटदार विनोद का कहब हवै कि उनके राशन कार्ड दस साल पुरान हवैं। यहिसे गल्ला नहीं मिलत हवै। उंई नये राशन कार्ड बनवाये तबै गल्ला मिली। या समय 68 अंत्योदय अउर बी.पी.एल. 74 राशन कार्ड बने हवैं।