किसी का हजारों में तो किसी का लाखों में! नरैनी में हो रहा है बिजली बिल पर जमकर विरोध

जिला बांदा, ब्लाक नरैनी|8 सितम्बर का हेंया बिजली का ज्यादा बिल आवै के कारन मड़ई तहसील मा धरना प्रदर्शन करिन हैं अउर एस.डी.एम का ज्ञापन दिहिन हैं|मड़इन का कहब है कि हेंया मड़इन के पैंतिस हजार से ग्यारह लाख तक के बिल आये है अउर बिजली के कटौती भी बहुतै ज्यादा होत है|हमार सुनवाई न होइ तौ हम बार-बार धरना प्रदर्शन करबै|बिजली विभाग के अधिकारी का कहब है कि जउन मड़इन के ज्यादा बिल आये है उनकर बिल ठीक कीन जई|बिजली के फाल्ट मारे से ऊपर से बिजली न रहै के कारन बिजली कटौती होत है यहिसे हम खुदै परेशान है
शिव प्रताप बताइस कि मैं किसान आहूं पहिले मोर पांच हजार बिल आवत रहै चौसठ हजार बिल आवा है रात दिन बिजली कटौती होत है कौशल किशोर बताइस कि बिजली विभाग वाले बिल ज्यादा भेजत है अउर धमकी देत है नहीं तो बिजली काट दीन जई|कमला कान्त व्दीवेदी का कहब है कि दस साल से मेरठ के प्राइवेट कम्पनी रीडिंग का काम करत हैं अउर रीडिंग करे वाले मड़इन से रुपिया मांगत हैं|
बुंदेलखंड किसान यूनियन के प्रदेश सचिव लक्ष्मण प्रसाद मिश्र का कहब है कि बीस घंटा के जघा दस घंटा बिजली रहत है पांच-छह साल से सूखा पड़ा है गरीब किसान मरे के कगार मा हैं आपन बच्चन का खावा नहीं पावत तौ येत्ता ज्यादा बिल कसत भरिहैं|

बाईलाइन-गीता 

12/09/2017 को प्रकाशित