किसान के साथे तहसीलदार ने करी मारपीट

जिला महोबा, ब्लाक जैतपुर, गांव टिकरिया। एते के किसान ग्यासीलाल को आरोप हे की 16 नवम्बर खा तहसीलदार राम जी ने मारपीट करी हे। किसानन ने 24 नवम्बर खा प्रर्दशन कर कोतवाली में ज्ञापन दओ हे साथई कारवाही की मांग करी हे।
ग्यासीलाल बताउत हे की में 16 नवम्बर खा वकील से मिलन आओ हतो। तभई गेट से तहसीलदार रामजी गाड़ी में आओ ओर गाली गलौज करन लगो। साथई मारपीट भी करी हे। ईखी दरखास एस.पी खा दई हती, पे कछू नईं भओ हे। किसान मण्डल के जिला अध्यक्ष रामस्वारूप यादव कहत हे की अभे तक तहसील के अधिकारिन ने कछू जवाब नईं दओ, 24 नवम्बर खा तहसील में धरना प्रर्दशन करो पे कोनऊ अधिकारी ने ज्ञापन नईं लओ हे। किसानन में बोहतई गुस्सा छाओ हे। कोतवाली मं दरखास देके मुकदमा लिखें की मांग करी हे। कुलपहाड़ कोतवाल सतीश चन्द्र शुक्ला जांच कर कारवाही करें की बात कहत हे। कुलपहाड़ एस.डी.एम. मुहम्मद रिजवान कहत हे की अभे तक ई मामला के बारें में जानकरी नईं हती। अगर मारपीट ओर गाली गलौज करी हे तो तहसीलदार के ऊपर जरूर कारवाही करी जेहे।