काश्तकार किसानन का कबै मिली मुआवजा

जिला चित्रकूट, ब्लाक रामनगर, गांव लोधौरा बरेठी। हिंया के किसानन का आरोप हवै कि बड़े किसान का सूखा राहत का चेक सरकार कइती से नहीं मिला आय। यहिके खातिर रामनगर ब्लाम मा अउर डी.एम. नीलम अहलावत से 5 मार्च का कहा गा। उंई भरोसा दिहिन कि यहिके खातिर सरकार से कहा जई।
गांव के काश्तकार किसान राकेश कुमार 18 बिगहा, सोमदत्त के 37 बिगहा, हरिश्चन्द्र के 17 बिगहा और भूरालाल यादव के 30 बिगहा जमीन हवै। उंई सबै किसान कहिन कि उनका सरकार कइती से मुआवजा नहीं मिला आय। खेती मा कउनौ फायदा नहीं आय। यहिसे हम किसान भूखन रहैं के कगार मा पहुंच गे हन। हमार या साल पूर जमीन परती परी हवै। अपने बच्चन के स्कूल के फीस तक नहीं जमा कइ पाइत हन। मुआवजा खातिर लेखपाल राजकुमार से भी कहे हन, पै वा कउनौ ध्यान नहीं देत आय। यहै से डी.एम. नीलम अहलावत से कहे हन।
लेखपाल राजकुमार का कहब हवै कि सरकार कइती से 11 बिगहा जमीन वाले किसानन का चेक आय रहैं। उनका बांट दीन गें हवैं। बड़े काश्तकार किसानन का चेेक सरकार कइती से नहीं आवा आय। अगर सरकार चेक देइ तबहिने काश्तकार किसानन का चेक दीन जा सकत है।
डी.एम. नीलम अहलावत का कहब हवै कि काश्तकार किसानन का मुआवजा दें खातिर सरकार से मांग कीन जई।