कार्यालयः-गोदाम में या पेड़ के छाव में

जिला शिवहर, प्रखण्ड तरियानी। यहाँ के आपुर्ती कार्यालय या त गोदाम में चलई छई या पेड़ के छाव में। सोचे के बात इ हई कि उनकर अपन भवन हई पर उ साँप के डेरा बन गेल हई।
स्कुटीभ इंजिनियर अनुज कुमार कहलथिन कि हम त अभी तीन महिना पहिले अइलि ह। कार्यालय के गोदाम बना देल गेल हई। एई में जनगणना के कागज, अनर्पुणा, अनतोदय के कागज जे डीलर जमा करई छथिन उहो सब रखल हई। इ भवन एतना जर-जर हो गेल हई कि कखनी गिरतई से कहल न जा सकई छई। अउर इहां पर संाप निकलई छई से कोई मजदुर ओई में काम न करेला जइथिन त काम केना होतई।
खाद्यान आपूर्ति पदाधिकारी अश्वनी कुमार कहलथिन कि कार्यालय के भवन बहुत पुरान हई। इहां पर साँप निकलईत रहई छई। केतना बेर त सपेरा के बोला के सांप के बझा के ले गेलई। लेकिन ओई के बावजुद ओई में सांप निकलईत रहई छई। हम गोदाम के ही खिड़की दरवाजा लगा के कार्यालय बना देवई।