राजकिय मध्य विद्यालय केथरीया
जिला सीतामढ़ी, प्रखण्ड डुमरा, पंचायत में माझौलीया, गांव केथरीया। उहां राजकिय मध्य विद्यालय में शिक्षा समिति के बैठक नियम से न होई छई। जबकि प्रधानाध्यापक के कहना हई कि हम सब महिना में बैठक करइले।
उहां के शिक्षा समिति के सदस्य कैलाशिया देवी, मीना देवी कहलथिन कि हमरा सब के मालूम न होई छई कि कहिया बैठक हई। जब छपरा में खाना खाये से बच्चा मर गेल रहई। ओई समय एक महिना बच्चा विद्यालय में खाना न खलई। एई के लेके डुमरा में मिटिंग रहई त हेडमास्टर कहलथिन कि आहो सब के डुमरा चले के हई। फेर तनके देर के बाद भेलई कि न जाय के हई इहें से काम हो जतई। एई सही घरे आ के हमेशा रजिस्टर पर दसतखत करवा लेई छथिन। सचिव बीना देवी कहलथिन कि सब महिना में बैठक होई छई। जेइमें एगो महिला अउर पांच पुरूष छथिन।
अध्यक्ष रामचन्द्रर पासवान कहलथिन कि सब महिना में विद्यालय में ही बैठक होई छई। जेइमें चार महिला दु पुरूष छथिन। प्रधानाध्यापक विनोद कुमार कहलथिन कि एई विद्यालय में कुल छौसौ अठारह बच्चा के नामांकन हई। जेइमें लगभग साठ प्रतिशत उपस्थिति रहई छई। हम सब महिना शिक्षा समिति के बैठक करइले। जेकर लिखित साबूत भी हई। प्रखण्ड शिक्षा पदाधिकारी कपिलेश्वर प्रसाद कहलथिन कि हमरा पास अपने बहुत काम रहइय, जेइ कारण हम जांच न करई ले। कहियो जाई छी ते देखई छी मिटिंग होई छई।