जिला चित्रकूट, कस्बा कर्वी बहुजन समाज पार्टी के पूर्व विधायक आर.के .पटेल आपन पार्टी बदल दिहिन हवैं। या दरकी उंई भारतीय जनता पार्टी कइत से चुनाव लड़त हवैं।
मऊ अउर मानिकपुर क्षेत्र से या दरकी उंई चुनाव लड़िहैं आर .के. पटेल के पार्टी बदले के साथ-साथ विचारधारा भी बदल गें हवैं।पहिले उंई बहुजन समाज पार्टी के गुण गावत रहै, अब भारतीय जनता पार्टी के गुण गावत हवैं। टिकट मिलै के बाद येत्ती जल्दी विचार बदल गें हवै नेताजी के, चित्रकूट के जनता या सवाल उठावत हवैं। पूर्व विधायक आर.के. पटेल बहुजन समाज पार्टी के बारे मा कहत हवैं कि बहन जी मायावती के विचारधारा बहुत नींक हवैं। उंई मोहिका एक सौ दस सीट के जिम्मेदारी दिहिन रहै। आवै वाले 2017 के चुनाव मा बहन जी का वोट देव केन्द्र मा बहुजन पार्टी के सरकार बनाओं। फेर देखो पिछड़े वर्ग का कोटा भर दीन जई। देश का प्रधान मंत्री पिछड़े वर्ग खातिर कुछौ नहीं करिन आय। नोटबंदी के कारन बहुतै परेशानी होत हवै। बाप .दादा.चाचा कउनौ मोबाइल चलावैनहीं जानत तौ रुपिया का लेन-देन कसत करि हैं।
भारतीय जनता पार्टी के बारे मा आर .के .पटेल का कहब हवै या पार्टी के विचार बहुतै नींक हवै या कारन मैं या पार्टी से जुड़े हौं। केन्द्र अउर राज्य मा अलग-अलग सरकार रहत हवैं तौ देश के विकास मा बाधा पैदा करत हवैं। यहै कारन मैं चाहत हौं कि या दरकी केन्द्र अउर राज्य मा भारतीय जनता पार्टी के सरकार बनै। मोदी सरकार नोटबन्दी कइके अच्छी राजनिति अपनाइन हवैं। पहिले बैंक मा लाइन लागत रहै अब लाइन नहीं देखाई देत हवैं।
रिपोर्ट- खबर लहरिया ब्यूरो
03/02/2017 को प्रकाशित
