खबर लहरिया अम्बेडकर नगर करोंड़न के लागत से बनीं पानी कै टंकी करत रिसाव

करोंड़न के लागत से बनीं पानी कै टंकी करत रिसाव

जिला अम्बेडकरनगर, ब्लाॅक टाण्डा, ग्रामसभा हंसवर। हिंआ करोड़न रुपया के लागत से बनीं पानी कै टंकी से दुइनौ महीना पानी कै सप्लाई नाय भै। टंकी मा रिसाव हुवय लाग।
ग्रामीण जयप्रकाश मौर्य, दिलीप कुमार, दिनेश कुमार, नारद विश्वकर्मा, पवन कुमार बताइन कि पानी सप्लाई के ताई विछी पाइप जगह जगह टूटगै। अउर दुइयौ महीना पानी नाय मिला टंकी मा रिसाव हुवत बाय। जेसे पानी कै बर्वादी हुवत बाय। हिंआ के मनइन कै आरोप बाय कि टंकी कै बनावट मानक के अनुसार नाय भै बाय। 2008 मा प्रधान प्रतिनिधि अवुल वफा के प्रयास से तत्कालीन मंत्री नसीबुद्दीन सिद्दकी ग्रामीण पेयजल योजना के तहत लगभग चार सौ उन्नीस लाख के लागत से पानी आपूर्ति के ताई धन आवंटित कीनगै रहा। ग्रामसभा हंसवर मा करीब सत्तरह आठ सौ जनसंख्या बाय जेहमा पानी की ताई करीब दुई सौ ग्रामीण कनेक्शन लिये रहिन।
जल निगम कै अधिशाषी अभियंता अनिल चन्द्रा बताइन कि अबहीं टेस्टिंग कै काम चलत रहा। टंकी व पाइप कै लिकेज जल्द ही ठीक कराय जाये।