बस का इंतजार करत यात्री
बांदा से राजापुर का चलैं वाली तीन बसन मा से दुई बसैं लगभग डेढ़ महीना से बंद हैं। मड़इन का आवै जाय मा प्राइवेट साधन का घण्टन इंतजार करैं का परत है।
राजापुर जाय वाले श्यामसुन्दर अउर रतन कहत हैं कि उंई सुबेरे दस बजे से बस के इंतजार मा बइठ हैं। उनका एक दिन पहिले भी बस का इंतजार करत दिन बीत गा रहै। दादौं घाट जाय खातिर छह घण्टा से बइठ रामदेव का परिवार भूख पियास अउर गर्मी के मारे बिलबिला उठा। पूछैं मा बहुतै गुस्सा से बोला कि वहिका आपन परिवार गांव मा छोड़ के वापस लउटै का है। जेहिसे कि वा परीक्षा दें जा सकै, पै बस न मिलैं से लागत है कि परीक्षा छूट जई।
यहिनतान रोडवेज बस स्टाप मा बांदा से राजापुर तक सफर करैं वाले दसन मड़इन का कहब है कि या सड़क मा हमेशा से बसन के दिक्कत रही है, पै विभाग कतौ गम्भीरता से समस्या का नहीं लेत आय।
परिवहन विभाग के सहायक क्षेत्रीय अधिकारी महेश कुमार का कहब है कि सड़क खराब होय के कारन आय दिन बस बेगड़ी परी रहत हैं। विभाग का बहुतै घाटा लागत है। यतनी समस्या है तौ एक अउर बस बढ़ा दीन जई।