खुरहण्ड गल्ला मंडी
जिला बांदा, ब्लाक महुआ, गांव खुरहण्ड समेत कइयौ गांव। हेंया के गल्ला मंडी मा बारिश से भींग धान कम दाम मा खरीदा जात है, या फेर वापस कर दीन जात है। यहिसे किसान प्राइवेट दुकानन मा औने-पौने दाम मा धान बेचैं का मजबूर हैं।
खुरहण्ड गांव के किसान जगविजय अउर रामबरन बतावत हैं कि हमार लगभग डेढ़ सौ कुन्तल धान बारिश के पानी मा खराब होइगा है। यहिसे खुरहण्ड गल्ला मंडी मा धान नहीं खरीदत आय। अगर खरीदत हैं तौ सात आठ सौ रूपिया कुन्तल मांगत हैं। जबै कि धान का सरकारी दाम एक हजार तीन सौ दस रूपिया है। धान भींग गा है तौ यहिमा हम कई सकत हन। अबै अगर सोसाइटी हमैं खाद के फाट बोरी देत है वहिकर तउल भी कम होत है तबै भी हमैं रूपिया तौ पूरा दें का परत है।
छिबांव गांव का किसान बच्चा दुबे कहत है कि मोर सौ कुन्तल धान लाल होइगा है तौ मंडी वाले नहीं खरीदत आय। इटरा खुर्द गांव के किसान बतावत हैं कि हम किसान एक कइत धान बेचंै का परेशान हन तौ दूसर कइत खेतन मा ठाड फसल पानी भरा होय से सड़ी जात है। किसान तौ दूनौ कइत से मारा जात है। फेर भी सरकार किसान के मदद करैं के बजाय धान सरकारी कीमत मा न खरीद के परेशान करैं मा लाग है। खुरहण्ड गल्ला मंडी के मुनीम कहत हैं कि जउन खराब धान है वा एक हजार से ग्यारह सौ रूपिया तक का लीन जात है अउर नींक धान के सरकारी कीमत एक हजार तीन सौ दस रूपिया है। धान खराब अउर नींक के हिसाब से खरीदत हन।
धान बेचैं का आये किसान