कतौ बिना बिजली बिल, तौ कतौ बिजली के कटौती

बिटिया बतावैं आपन समस्या

जिला बांदा, ब्लाक तिन्दवारी, गांव बरेठी कला अउर बबेरू ब्लाक का कस्बा बबेरू, मोहल्ला श्रंगार थोक। इं दूनौ गांवन मा कतौ बिजली के कटौती कीन जात है, तौ कतौ बिना बिजली बिल भेजा जात है।
बरेठीकला के उमा देवी, अर्चना अउर संध्या बतावत है कि 3 मार्च 2014 से हमार पेपर हैं। या समय इण्टर के पढ़ाई है। सोचत रहन कि सुबेरे चार बजे से बइठ के पढ़ब, पै बिजली कटौती होय के कारन हमार पढ़ाई नहीं होइ पावत आय। अगर नींक से पेपर न होई हैं, तौ हमार पूर साल के पढ़ाई बरबाद जई।
पलरा कस्बा बिजली पावर हाउस के जेई संतोष कुमार मिश्रा का कहब है कि शाम आठ बजे से सुबेरे आठ बजे तक बिजली रहत है। फेर दुपहर दुई बजे से शाम चार बजे तक बिजली रहत है। मड़ई झूठ बोलत है।
बबेरू कस्बा, मोहल्ला श्रंगार थोक का शारदा प्रसाद बतावत है कि मोर बबेरू कस्बा के अतर्रा रोड मा दुकान है। चार साल होइ गे दुकान मा कतौ बिजली नहीं आवत, पै बिजली विभाग वाले बिल बराबर भेजत है। पहिले कनेक्शन लिने रहै, पै चार साल पहिले कनेक्शन कटा दीनहौं अउर बिजली विभाग वाले तार काट लइगे रहैं। एक दरकी बिल एक सौ पन्चानबे रूपिया अउर दुबारा चैदह हजार रूपिया आवा रहै। तबै मैं बिजली विभाग मा कहेहौं, पै बिजली विभाग वाले ध्यान नहीं दिहिन। अब साठ हजार रूपिया बिल आवा है। यहिसे मैं सोचत हौं मोर दुकान मा बिजली लाग है या नहीं जांच होय।
बबेरू बिजली विभाग के सब स्टेशन अधिकारी मुन्नी लाल का कहब है कि उंई झुठ बोलत हैं। बिना बिजली कउनौ का बिल नहीं लीन जात आय। अगर इनतान के समस्या है, तौ जांच कीन जई।