एस.डी.एम. भी नहीं करिन कारवाही

आपन बड़ा लड़का संदीप के साथै दरखास दें आई फूला

जिला बांदा, ब्लाक बबेरू, गांव आहार। हेंया के फूला बतावत है कि वा किसान दुर्घटना बीमा योजना का लाभ पावैं खातिर एक महीना से परेशान है। बबेरू एस.डी.एम. अउर तहसील दिवस मा दरखास दई चुकी है। 15 मार्च 2014 का डी.एम. का दरखास दिहिस है।
फूला कहिस-“मोर मनसवा राजकरन के मउत 16 जनवरी 2014 का ठण्डी लागै से होई गे है। उंई खेत मा पानी लगावैं गे रहै। ठण्डी से मउत होय का कारन जांच रिपोर्ट से पता चला रहै। मेडिकल रिपोर्ट मा दिल का दौरा परैं से मउत होब निकल के आवा है। मोरे दुई नाबालिग बच्चा हैं। बड़े लड़का संदीप के उमर नौ साल अउर छोट लड़का अभिजीत के उमर साढ़े तीन साल है। अब मैं आपन बच्चन का पेट तौ कउनौतान बनी मजूरी कइके चलावत हौं। इनके पढ़ाई लिखाई कहां से कराऊं। यहै मारे किसान दुर्घटना बीमा योजना के तहत मिलै वाला पांच लाख रूपिया का लाभ पावैं खातिर हेंया होंआ भटकत हौं। बबेरू तहसील दिवस अउर बबेरू एस.डी.एम. का 12 फरवरी 2014 का दरखास दई चुकी हौं।”
बबेरू एस.डी.एम. आर.के. श्रीवास्तव कहिन कि राजकरन के मउत बीमारी के कारन भे है। या मारे वहिका किसान दुर्घटना बीमा योजना का लाभ न मिली।”