जिला चित्रकूट, ब्लाक रामनगर, कस्बा राजापुर 1 मई का कल्ला आपन मेहरिया कलावती का मिटटी का तेल डाल के जला के मार डालिस हवैं ।मइके वाले थाना मा रपट लिखा के कारवाही के मांग करिन हवैं।सी.ओ महेन्द्र शुक्ला मौके मा जांच करिन हवैं। अउर कल्ला का पकड़ के जेल भेज दिहिस हवै।अब सवाल या उठत हवै कि का योगी सरकार इनतान के दहेज हत्या के मामला मा रोक लगा पई?
कलावती के महतारी मधु बताइस कि मोर लड़की खाना बनावत रहै तबै लड़ाई होइ गे अउर मोर दामाद लड़की का जान से मार डारिस हवै।मोर लड़की ससुराल जाये का डेरात रहि हवै। 2 मई का जबै लड़की के लाश हिंया आई हवै तबै लाश देखा हवै तौ हाथ पांव मूड़ सगले चोट के निशान रहे हवैं।
बहिनी राम देवी बताइस कि हम बर्तन बेंचे कटनी जात रहै फेर हमें नहीं पता केत्ती देर मोर बहिनी का जान से मार डारिस हवैं।
सास लक्ष्मी देवी बताइस कि मोर लड़का के शादी का चार साल होइ गें हवै पै इनतान के लड़ाई कत्तौ नहीं भे आय कि लड़का बहू का जान से मार डालत।
कलावती का लड़का दिल खुश बताइस कि मोर बाप मोर महतारी का मिटटी का तेल डाल के जला दिहिस हवै। मैं बचाबत रहेव तौ ताला लगा के बेड़ दिहिस रहै। बाप से डेर लागत हवै मै आपन दादी साथे रहिहौं। सी.ओ महेन्द्र कुमार शुक्ल का कहब हवै कि लड़की के बाप दहेज़ हत्या के रपट लिखवाइस हवै।
रिपोर्टर- सहोद्रा
09/05/2017 को प्रकाशि
