जगभान
जिला महोबा, ब्लाक कबरई गांव पवा। एते के देशराज को सूपा ओर लाड़पुर के बीच में बस नम्बर यू.पी.95 टी 3112 ओर मोटर साइकिल से एक्सीडेन्ट भओ हे। जीमे देशराज की मोत हो गई हे। ओर सुनील खा झांसी रिफर कर दओ हे।
देशराज की ओरत बताउत हती की मोओ आदमी 19 सितम्बर 2013 खा शाम 7 बजे सुगिरा गांव से आउत हते। तभई सूपा ओर लाड़पुर के बीच में ठाड़ होके पेशाब करन लगे। महोबा से जा रही राठ डिपो ने धक्का मार दओ। बस वालो बस लेके भग गओ हे। हमे ईखी सूचना गांव के आदमियन ने फोन से दई, ओर ओई ने सुनील खा जिला अस्पताल में भर्ती कराओ हे। ईखी रिपोर्ट हमने चरखारी कोतवाली में करी हे।
सूपा चैकी इन्चार्ज ख्याली राम पटेल ने बताओ कि अभे ऊखी जांच नई हो पाई आय। काय से बस हमीरपुर जिला की आय। ऊखो मुकदमा धारा 279 (लापरवाही से दुर्घटना) 427 (नुकसान) 337 (किसी साधन को तेज चलाना) 338 (टक्कर मार देना) 304 (किसी की मोत हो जाना) के तहत मुकदमा लिखो हे। जांच के बाद ड्राइवर खा जेल भेज दओ जेहे।
एसई महोबा से कबरई जात आटो खा किड़ारी ओर बरीपुरा के बीच में 20 सितम्बर 2013 खा एक्सीडेन्ट भओ हे। जीसे आटो में सवार फूलचन्द्र, चरन यादव ओर एक अज्ञात आदमी की मोत भई हे। ओर चार आदमियन खा झांसी रिफर कर दओ हे। फूलचन्द्र के लड़का जगभान ने बताओ कि हम महोबा से कबरई जात हते। तभई कबरई से आउत छोट ट्रक ने टक्कर मार दओ। जीसे आटो में बेठे तीन आदमियन की की मोत हो गई हे। चार आदमियन खा झांसी रिफर कर दओ, बाकी को इलाज जिला अस्पताल में चलत हे। ईखी सूचना महोबा कोतवाली में दई हे। महोबा कोतवाली के मुंशी श्रीराम ने बताओ कि अज्ञात लाश छतरपुर जिला की आय। गाड़ी पकर गई हे। धारा 279, 337, 338 ओर 304 ए.आई़.पी.सी. के तहत ड्राइवर खा जेल भेज दओ हे।