जर-जर पुल
जिला सीतामढ़ी प्रखण्ड बथनाहा गांव दोसपुर। बरीयारपुर से दोसपुर जाय सड़क के पुल बहुत जरजर हई जेइ कारण पुल पर गाड़ी चलावे में दिक्कत होइ छई। लेकिन विभाग के लोग एइ समस्या पर ध्यान न देइ छथिन।
इहां के लोग गोविन्द्र राय, रामकिशोर कुमार, राकेश गोसाइ, इंदल कुमार सब कहलथिन कि दोसपुर के पुल त गांव में जाय वाला पुल हइ। लेकिन सब से बरका समस्या त सीतामढ़ी से सुरसण्ड, परिहार गांव में जाय वाला सड़क के हई। एइ सड़क से बस चलइ छई जइमें के कयगो पुल खराब हई। ओइ पर भगवाने भरोशो गाड़ी चलइ छई। ओइ रास्ता हो के प्रखण्ड से लेके जिला तक के अधिकारी अबइ-जाइ छथिन लेकिन एइ समस्या पर ध्यान न देइ छथीन। जब कोई घटना हो जतइ तब दु चार हजार रूपइया के अनुदान देके जान छोराबे अबइ छथिन, लेकिन ओइ से पहिले समस्या के समाधान न करइ छथिन।
ग्रामिण विकास विभाग के जिला सहायक कार्यपालक अभियांता संजय कुमार कहलथिन कि पुरे जिला में एक्तीस पुल बन रहल हई। जेइ मे सीतामढ़ी से सुरसण्ड, परिहार जाय वाला रोड के पुल पी.डब्लू.डी. विभाग से बनइ छई। हमरा विभाग से केवल ग्रामीण सड़क के पुल बनइ छई। दोसपुर गांव के पुल प्रोपोजल बन के गेल हई उहां से पास होके अतई तब पुल बनाएल जतई।