उपकेन्द्र आय, की अन्ना जानवरन को घर

उपकेन्द्र में रहत आदमी

जिला महोबा, ब्लाक चरखारी, गांव लुहारी। एते बनो मातृ शिशु कल्याण उपकेन्द्र कभऊं नई खुलत आय। ई केन्द्र खा बनो आठ साल हो गये, पे गांव को आदमी जो नई जानत, कि का बनो हे। काय से ऊ केन्द्र मे कछू नाम नई लिखो हे।
वार्ड नम्बर पांच के ख्यालीराम, लक्ष्मी प्रसाद नारायण ने बताओ कि पहले ई जघा पे प्राथमिक स्कूल बनो हतो। पिछली पंचवर्षी में सुनो के एते अस्पताल बन गओ हे, पे अस्पताल में जोन ए.एन.एम. ओर डाक्टर आय खा चाही ऊ कभऊं नई आउत। गांव के आदमियन खा जो नई पतो हे कि जा अस्पताल आय। काय से अभे तक एते आदमियन के अन्ना जानवर बेड़त हते। अब अगस्त 2013 से केशर रानी नाम की ओरत आपन परिवार लेके रहत हे।
मदन पाल बताउत हे कि जब एते ए.एन.एम. नई आउत ओर न ई केन्द्र में कछु लिखो हे, तो आदमी केसे जानहे कि जो का हे।
प्रधान सुदामा देवी के आदमी चन्द्रशेखर ने बताओे कि मेने पिछले साल चरखारी में बड़े डाक्टर से कहो हतो। ओते जीखी ड्यूटी होय ऊखे भेज दओ जाय, तो डाक्टर कहत हतो कि लुहारी को केन्द्र कहंू लिखित में नइयां। ऊ अभे हैण्डओवर नई भओ आय।
सी.एम.ओ. एन.एल. यादव बताउत हें कि में 19 अक्टूबर 2013 खा आओ हों। मोये ज्यादा जानकारी नइयां। पे ऊ केन्द्र गोरखा के नाम से लिखित सूची में हे। ओर हैण्डओवर भी हो गओ हे। अगर ओते कोनऊ समस्या हे, तो में जाके देखहों, ओर अगर ए.एन.एम. न आउत होहे तो कार्यवाही करी जेहे ।