फुको धरो ट्रान्सफारमर
जिला महोबा, ब्लाक चरखारी, कस्बा खरेला। एते मेन सड़क में तीन-तीन ट्रान्सफारमर धरे हे, पे ऊखे फुंके होय के कारन तीन मोहल्ला के आदमी अंधेरे में बसर करत हें।
एते के वीरसिंह ओर राजसिंह ने बताओ कि हमाये मानिक मोहल्ला में तीन ट्रान्सफारमर हे। जीमें एक ट्रान्सफारमर 7 अगस्त 2013 से फुंको परो हे, ओर एक तेल फेंकत हे, ओर एक खराब हे। एसई जालिब मोहल्ला, मानिक मोहल्ला के साथे आधे खरेला कस्बा के आदमी अंधेरे में हे। सोचे वाली बात तो जा हे कि चार सो के.वी. को ट्रान्सफारमर चारई दिन पेहले महोबा से आओ हतो। जोन चार दिन भी नई चलो आय, ओर फुंक गओ हे। एई से एते के आदमी बोहतई परेशान हे। बिजली विभाग खरेला में केऊ दइयां कहे के बाद भी कछू सुनवाई नई भई आय। कछु लोगन ने कहो हे कि ओते को ट्रान्सफारमर जान बूझ के फुंको दओ जात हे। खरेला बिजली विभाग के जे.ई प्रवीण कुमार यादव ने बताओ कि प्रस्ताव बना के महोबा भेज दओ हे। जभे दूसरो ट्रान्सफारमर आ जेहे तो ओते ट्रान्स्फारमर धरा दओ जेहे।