उत्तर प्रदेश के मुख्यमंत्री अखिलेश यादव के आदेश मा 1 मई से 10 मई तक हर जिलन मा समाजवादी विकास साइकिल यात्रा निकाली गे। जेहिके समापन 10 मई का चित्रकूट जिला के कर्वी कस्बा दीपक टाकीज के सउहें कीन गा येहिमा लगभग पांच सौ समाजवादी पार्टी के अउर गांव के मेहरिया, मनसवा शामिल रहै।
जिला के सपा अध्यक्ष भइया लाल यादव पार्टी खातिर बढ़ चढ़ के बोलिन। कहिन कि जउन काम कउनौ पार्टी नहीं कई पाइस। वा काम सपा पार्टी के मुखिया अखिलेश कइके देखा दिहिस। यहिसे 2017 मा फेर से उनका लाये का हवै। सूखा के बारे मा कहिन कि जिला मा पिछले कइयौ बरस से सूखा पऱत हवै, पै वहिके खातिर केन्द्र सरकार कुछौ नहीं करिस। अध्यक्ष, नेता मुख्यमंत्री के बड़ाई करै मा लाग रहै, पै गांव से बुलाये गें मड़ई भूख पियास से तड़पत रहैं। या मारे उंई तौ रोटी अउर पानी,पानी चिल्लात रहैंं। कहत रहैं सूखा के मार झेलित हन मुख्यमंत्री तौ बढ़िया ठण्डे मा बइठ के भाषण देत हवै। रानीपुर भट्ट गांव के लोग बताइन कि दस दिन साइकिल से जिला के हर गांव गांव गये हन 2017 का खूब प्रचार करे हन, पै इनतान के घाम मा हम पंचन के तबियत खराब होइगे। कुछ लोग कहिन कि चाहे जउन सरकार होय कुर्सी मिलते जनता का भूल जात हवै, अबै चुनाव आय वाला हवै। या से साइकिल यात्रा निकाले चाहे किट बंटवावैं यहिसे मड़इन का कउनौ फायदा नहीं आय। भाषण मा तौ मड़ई बहुतै कुछ कही देत हवै, पै वहिका करत कत्तौ नहीं आय।
रिपोर्टर – मीरा जाटव